ఈశాన్య మూల కర్ర ఉంటే..? (విశ్వాసాలు.. వాస్తవాలు...)

ఈశాన్య మూల కర్ర ఉంటే..?

Share కె.ఎల్‌.కాంతారావు, జన విజ్ఞాన వేదిక.   Wed, 8 Feb 2012, IST  

• విశ్వాసాలు.. వాస్తవాలు...
  

ఇటీవల (2011 ఆగస్టులో) మా మిత్రుడు సత్యనారాయణ మా ఇంటికొచ్చాడు. అతనితో మరొకాయన వచ్చాడు. ఆయనను రామ్మూర్తిగా మా మిత్రుడు పరిచయం చేశాడు. కుశల ప్రశ్నలయ్యాక నేనూ, సత్యనారాయణ కబుర్లలో పడ్డాం. రామ్మూర్తి ఏం మాట్లాడకుండా ఇంటిని పరిశీలించడం గమనించాను. సడన్‌గా రామ్మూర్తి మా సంభాషణలో జోక్యం చేసుకుంటూ 'కాంతారావు గారూ! మీ ఇంటికి వాస్తు చాలా బాగుందండీ, తూర్పువైపు వాకిలి అన్ని విధాలా శ్రేయస్కరం' అన్నాడు నేను నవ్వుతూ 'రామ్మూర్తిగారూ! ఇంట్లో ప్రతిగదిలోను ఈశాన్య మూలన కర్రలుండటం వాస్తు ప్రకారం మంచిదే గదా?' అన్నాను. వెంటనే రామ్మూర్తిగారు 'అమ్మో! ఉండకూడదండీ!' అంటూ తన సంచీలోని గౌరు తిరుపతిరెడ్డి 'వాస్తు శాస్త్రం' అనే పుస్తకం తీసి, దానిలో 170వ పేజీ తెరిచి ఇలా చదివారు. 'పొరకలు, రోకళ్లు, కర్రలు నైరుతి మూలయందుంచవలెనేగాని ఈశాన్యంలో కొంచెం సేపైనా ఉంచరాదు'.
'అలా ఉంచితే ఏమౌతుందండీ' అని అడిగాను.
'అలా చేయడం వల్ల ఎన్నో ఆర్థిక వైపరీత్యాలు, అనర్థాలు కలగడం అనుభవరీత్యా తేలిన విషయాలు' అని కూడా ఈ గ్రంథంలో రాసి ఉన్నదండీ' అన్నారాయన.
నేను వెంటనే లేచి హాలులోని తలుపును ముందుకు వేసి, 'అయ్యా! తలుపు వెనుక ఈశాన్య మూలలో ఏముందో చూడండీ' అన్నాను.
ఆ మూలన ఒక కర్ర ఉంది. ఆయన ఆశ్చర్యంగా చూడసాగాడు. 'అయ్యా! ఇటురండి' అని ఆయనను పిలిచి ప్రతిగదిలోను ఈశాన్య మూలనున్న కర్రలను చూపించాను. ఆయన మరింత ఆశ్చర్యంతో చూడసాగాడు. వెంటనే 'కాంతారావు గారూ! మీ శ్రేయోభిలాషిగా చెబుతున్నాను. వాటిని అక్కడి నుండి వెంటనే తీయించండీ' అన్నాడు. నేను నవ్వుతూ 'రామ్మూర్తిగారూ! మేము ఈ ఇంట్లోకి 2006 లో ప్రవేశించాం. అప్పటి నుండి ప్రతిగదిలోనూ ఈశాన్య మూలన ఒక కర్రను ఉంచాను. మా పని అమ్మాయి ఇల్లు ఊడ్చేటప్పుడు అడ్డంగా ఉందని ఏదైనా కర్రను తీసివేయబోతే నేను 'అమ్మా! ఆ కర్రను అక్కడ కావాలనే ఉంచాను. మరల అక్కడే పెట్టు' అని చెప్పాను. ఇప్పటికి ఐదేళ్ళుగా ఆ కర్రలు అక్కడే ఉంటున్నాయి. మాకు ఆర్థికబాధలు గానీ, అనర్థాలుగానీ ఏమీ రాలేదు. 'కాబట్టి ఈశాన్య మూలన కర్రలు కొంచెంసేపైనా ఉంచకూడదనడం అశాస్త్రీయమని రుజువు కావడం లేదా?' అన్నాను.
రామ్మూర్తిగారేం మాట్లాడలేదు.